قارئین! السلام علیکم! آج کل کے دور میں طب کو ایک معمولی سی چیز سمجھا جاتا ہے اور جب بھی کسی کے سامنے حکیم کا نام آتا ہے تو وہ سمجھتا ہے کہ باباجی ہوں گے۔ دو تین دوائیوں کی ڈبیاں سامنے رکھی ہوں گی اور قسمت ہے کوئی مریض آگیا تو آگیا ورنہ پھرساری دن چار بندے پاس بٹھا کر گپیں ہانکتے ہوں گے۔ مگر حقیقت ایسی نہیں جو ہم سمجھتے ہیں۔ میری ایک کاوش ہے کہ طب نبویؐ اس معاشرے میں کیسے پھیلے؟ اس کو پھیلانے کے لیے میں آپ کے سامنے پیش کرتا ہوں ’’طب نبویؐ اور جدید سائنس‘‘ پسند کریں‘ پسند کرائیں پڑھیں اور پڑھائیں اور جتنا ہوسکے پھیلائیں۔ میں آج آپ سے پودینہ کے بارے میں بات کروں گا۔ یقیناً آپ نے پودینہ کے فوائد تو بہت پڑھیں بھی ہوں گے اور اپنے بڑوں سے سنے بھی ہوں گے تو ذرا ان فوائد پر بھی نظر دوڑایئے۔
اس کے پتوں کا رس نیم گرم کرکے کان میں ڈالیں تو درد کا نام و نشان نہیں رہتا اور کان کے کیڑے مرجاتے ہیں اگر زبان پر خشونت آجائے تو اس کے پتوں کو زبان پر ملنے سے آرام آجاتا ہے اور دانتوں کے درد کی صورت میں پودینہ کے پتے چبانا بہت مفید ہے۔ڈیڑھ کپ پانی میں پودینہ سے پانچ پتے اور ایک انجیر ڈال کر پکائیں‘ جب ایک کپ رہ جائے تو اتار کر گھونٹ گھونٹ پی لیں۔اس سے سینہ اور پھیپھڑوں سے مواد غلیظ آسانی سے خارج ہو جاتا ہے اور کھانسی ‘دمہ‘ درد سینہ اور درد پہلو کو فائدہ ہوتا ہے۔ پودینہ معدے کی بیماریوں کے لیے اکسیر ہے۔ ہچکی کو دور کرتا ہے اور متلی اور ہیضہ کو روک دیتا ہے۔ خاص طور پر رمضان المبارک میں افطاری کے بعد اس کے پتوں کا قہوہ یا دوران افطاری اس کے پتوں کی چٹنی جو کہ گھروں میںعام بنتی ہے استعمال کرلی جائے تو پورا رمضان معدہ بالکل ٹھیک ہے۔ افطاری کے بعد کسی قسم کی سستی اورکاہلی نہیں ہوتی۔آئیے اب اس کے سائنسی تحقیق پر نظر ڈالیں۔جدید سائنسی تحقیقات: پودینے کے ذریعے بلڈپریشر کو بھی کنٹرول کیا جاتاہے۔ بلڈ پریشر کے مریضوں کے لیے پودینے اور لہسن کی چٹنی کھانا مفید ہے۔ پرسکون نیند کے لیے پودینے کو بڑی اہمیت دی جاتی ہے۔ اگر آپ بھی نیند کی کمی کا شکار ہیں تو اس کا استعمال سومند ثابت ہوسکتا ہے۔ پودینہ کا قہوہ پینے سے ناک، منہ، پھیپھڑوں، نظام تنفس کے امراض سے انسان بچا رہتا ہے۔ خاص طور پر پودینہ کا قہوہ پینے والے شخص کو وبائی امراض نہیں لگتے۔